راي الناس لا يؤثر في قيمتك

 بسم الله و الصلاة و السلام علي خير خلق الله

للاسف بعض الناس بتنتقد لمجرد الانتقاد ( تحس انه لازم يتكلم و يقول رايه حتي لو مفيش حد طلب رايه اصلا كان لو ماتكلمش هيموت) 

ممكن يكون السبب غيره او حقد او شايفك احسن منه

حاول ما تتاثرش بكل انتقاد بس خد بالك في انتقادات بتكون مفيده جدا بتصلح فيك حاجات وهي مهمه لكن الانتقادات المفيده بتكون قليله 

ماتنتظرش من حد يعمل لك قيمه لانك من غير حاجه ليك قيمه حتي لو الناس كلها ماتعرفش انت: 

١- انسان قال سبحانه (ولقد كرمنا بني ادم)  فربنا اللي كرمك

٢- ميزك الله بنعمه العقل و التفكير حتي لو مش بتستخدم عقلك في ابداع لكن تحت الضغط ووقت الازمات بتلاقي حلول لمشاكلك

٣- انت ما اذيتش حد كل الحكايه انك بتطالب بحق ليك او بتدافع عنه لان الناس بتحب الطيب بس بتاكل حقه و بتكره المطالب بحقه و بتقول عليه بلطجي و شريح و كخ و يع 😂 لكن بتعمله الف حساب 

ملحوظه: لاقيت ست في المواصلات بتقول البيت اللي مفهوش واحد صايع حقه ضايع 

محددات القيمه (ايه هي الحاجات اللي بتحدد قيمتك) 

١- عملك (شغلك)  قيمته كل واحد فيما يتقنه ( كل واحد بتتحد قيمته و اهميته بالحاجات اللي بيعرف يعملها و كل ما يكون شغلك مهم و كويس قيمتك بترتفع) 

٢- التعليم ( كل لما الناس تسالك و تحتاجك كل ما قيمتك ترتفع خد بالك في فرق بين ان الناس تسالك و بين انك تفرض نفسك عليهم و تحشر نفسك في اللي مالكش فيه ده اسمه تتطفل و بتكون غلطان)  

٣- مظهرك ( الشكل عليه عامل في القيمه لان الناس بتاخد بالشكل ممكن تتغاضي عن الشكل لفتره مؤقته بسبب او لاخر لكن حط في بالك ان الشكل عليه عامل في تشكيل قيمتك عند الناس) 

٤- ادبك و اخلاقك و اسلوبك و كلامك 

وبناءا عليه ( نفهم من كدا) 

ان كلام الناس اغلبه بيكون مش مهم وليس له تاثير في تحديد قيمتك ده غالبا لكن في ناس انتقادهم بيكون هادف و مش بيكون انتقاد هو بيكون نصيحه 

يعني ماتقفش عند كل كلمه تتقال خصوصا لو من شخص تافه و دي مش شتيمه ده وصف لحالته لان في ناس بيعينو نفسهم حكام و قضاه.....  بدون داعي هو مجرد شخص مش لاقي حاجه يعملها فبيرازي او يرزل او يغتت علي الناس بيتسلي

مثال توضيحي 

لو ورقه ب 200 ج الحلوه دي 😍المسكره الجميله دي 😂لاقيتها علي الارض هتاخدها ولا هتكسل تميل تاخدها؟؟ 😄 سمعتك وطي صوتك 😂

طيب لو لاقيتها في التراب متربه و متوسخه؟؟  

طيب لو لاقيتها في الطين؟ 

طيب لو لاقيتها في.....؟ 

خلاص سمعتك وطي صوتك 😂 يعني انت هاتاخدها في كل حالاتها 

تفتكر ليه؟ 

لان ليها قيمه انت عارفها كويس و مش هيفرق شكلها الخارجي حاليا المهم ان لها قيمه يعني لو قعدت مليون سنه جنبها تشتمها او لو قلت انك بتكره الفلوس اكيد محدش هيسمعلك و الناس هيقولو عليك عندك هسهس و يشحنوك علي العباسيه ده كله علشان الفلوس ليها قيمه في ذاتها حتي لو قديمه او مقطعه او مطينه 

فانت اغلي من الفلوس و انت ليك قيمه عند ربنا فانت خلق من خلق ربنا 

ربنا خلقك و ده شرف كبير 

و خلقك انسان مش اي نوع اخر من خلق الله 

كرمك بالعقل 

خلقك في احسن شكل بدون اي شي يعيبك 

فخد نفس و قول الحمد لله علي كل نعمك ما علمت منها ومالم اعلم 

ماتلتفتش لكلام الناس فالملتفت لا يصل 

و ال 200 ج رجعتها لصاحبها علشان كنت مستلفها 

هو انا لو معايا  🤑200 ج كنت وجعت قلبي في كتابه ده كله 😍